Sheila E. ta manera nan ta yam’é tambe “E Reina di tur klase i sorto di perkushon”, i aínda muchu mas ku esei, pasobra Sheila E. tin e kalidatnan artístiko di ta: Perkushonista, Kantante, Kompositora, un versátil músiko femenino di seshon i ademas di tur eseinan e in e don di ta aktris tambe. Siendo yu muhé di e famoso perkushonista di e género musikal di Jazz, Pete Escovedo, e artista merikano akí, a nase ku un amor espesial pa tur loke ta sonido di kueru i di batería i konga. Anke mundo ya a siña konos’é kaba, di su eksistensia meimei di añanan 80 - komo kompañera artístiko di Prince - ya el a kuminsá dal su stapnan musikal importante hopi tempu promé ku esei kaba, ya ku i pasobra e tabata toka perkushon pa entre otro músikonan manera: Michael Jackson, Herbie Hancock i Marvin Gaye. Den añanan 80, e kolaborashon ku “His Royal Badness”, a hib’é na fama mundial i konsekuentemente na éksitonan manera: The Glamorous Life, The Belle Of St. Mark i A Love Bizarre. Sheila E. a sigui forma parti di e banda di akompañamentu di Prince te na prinsipio di añanan 90, miéntras ku el a kolaborá tambe ku hopi otro artista di nòmber manera: Phil Collins, Gloria Estefan i Beyoncé. Aña pasá, Sheila E a lansa su di nuebe álbum riba merkado titulá: ‘Bailar’ i e sengel ‘Bemba Colorá’, ku a brind’é su di promé Grammy den e ramo di e “Mihó Interpretashon di Músika Global”.
