E banda ku e nòmber di “Gipsy Kings di Diego Bailardo”, a sa di tuma i adaptá e estilonan tradishonal di e género musikal di ‘flamenko” anto nan a meskl’é ku e género di ‘Pòp oksidental’ huntu ku ritmonan latino, pa e resultado bai resultá den un éksito musikal ku un aseptashon mundial. Gypsy Kings, ta un banda di famía, prosedente di Fransia ku su raísnan katalan, debí na e hecho ku nan antepasadonan tabata ‘gitano’ (gitano [zigeuner, nómada] spañó), ku a hui for di Spaña durante Guera Sivil na Spaña. E fundeshi basiko fundamental di e grupo a establesé su mes, na momento ku José Reyes a forma un banda ku su yunan hòmber bou di e nòmber di: “Los Reyes”. Despues di su morto, su yunan a uni ku nan primunan, e rurmannan Baliardo, anto nan a adaptá i kambia nòmber di e banda e ora ei den: “Gypsy Kings” (Reinan Gitano). Despues ku nan a hasi giranan musikal dor di Fransia, kaminda nan a toka na fiestanan di kasamentu, festivalnan i den fiestanan di den kaya; añanan 80 a trese pa nan meresidamente fama i a hasi nan famoso danki na nan di tres álbum homónimo i nan éksitonan “Djobi Djoba” i tambe “Bamboléo”. Ademas di e kansionnan original, tambe e otro vershonnan, ku nan a adaptá pa hasi eseinan nan propio interpretashonnan ku nan estilo flamenko úniko, ku tabata keda tòg rekonosibel. Diego Bailardo tabata presente for di prinsipio, kaminda e ta liderá te awor ku orguyo i eksitosamente e banda, ku e miembronan original di Gypsy Kings huntu i kombiná ku su generashon musikal nobo.
