Seis aña despues ku el a hasi su debut na Kòrsou e ‘Emperatris di Soul’ ta bini e isla bèk un bes mas.
Gladys Knight a kuminsá tempu e tabata hopi yòn: na edad di siete aña el a gana un sertamen di televishon di buskando talento, pa despues di un aña e mes funda un agrupashon musikal yamá The Pips. Komo Gladys Knight & The Pips e grupo akí a keda kontratá pa e afamado seyo diskero Motown i a anotá hopi éksito en partikular den añanan ’60 i ’70 ku e gran éksitonan
I Heard It Through The Grapevine, Midnight Train To Georgia i
Baby Don’t Change Your Mind. Na final di añanan ’80 Knight a kontinuá su karera musikal komo solista i el a anotá direktamente otro éksito ku e kansion di e pelíkula di James Bond
License To Kill. E no tabata kanta solamente, pero el a traha nòmber tambe komo aktris i empresaria ademas di esei e tabata embolbí den hopi trabou sosial karitativo. Na aña 2014 a sali su álbum mas resien titulá:
Where My Heart Belongs, un álbum original i auténtico di músika Gospel kaminda por skucha tambe e presensia di e grupo The Pips. Knight tin entre tantu shete Grammy i numeroso otro galardon mas riba su nòmber.