Juan Luis Guerra a hasi loke niun kompatriota di dje a logra: internashonalisá e músika festivo eksitante (merengue) di Repúblika Dominikano. Esaki no a bai asina di mes. Kaminda otro artista di merengue a pone riba disko nan muzik den ún solo bes, Guerra a lucha lunanan largu den studionan di grabashon pa e por haña e balansa perfekto.
E éksito internashonal grandi i ku esei e balansa perfekto ta bini ora e traha su di sinku álbum ‘Bachata Rosa’. Pa di promé bes muzik di kaya karibense a keda hinká den un bachi moderno. Eksótiko pero tòg oksidental. Soñadó, pero na mes momento eksitante , yen di emoshon. Divershon, pero ku pretenshonnan intelektual. Ku e álbum akí el a bira den un tiru mundialmente . konosí. Esaki tabata tin komo resultado hopi konsierto den stadion rònt mundu y ademas un skala di álbum nobo tur di mesun nivel haltu.
