Diferente Artista di kalidat superior pa e di 4 edishon di Curaçao North Sea Jazz

Nada ménos ku Luis Miguel, The Roots, Raphael Saadiq, Los Lobos, Christian McBride Big Band, New Cool Collective i Esperanza Spalding Radio Music Society ta e promé nòmbernan konfirmá pa e di kuater edishon di CuraçaoNorth Sea Jazz festival. Ku e promé nòmbernan akí, e tradishon di CuraçaoNorth Sea Jazz ta kontinuá na un manera masha bunita. E organisashon ta den kontakto intenso pa kaba di konfirmá e diferente otro artistanan. Lo anunsiá nan den kurso di e lunanan benidero. Pa loke ta trata e konsierto grátis na Brionplein riba djaluna 26 di ougùstùs ya tin El Gran Combo de Puerto Rico konfirmá.

E kantante mehikano Luis Miguel ta un íkono den paisnan di habla spañó. Nan sa yam’é tambe El Sol. E tin numeroso premio riba su nòmber entre nan sinku Grammy i kuater Latin Grammy. E ta e úniko artista latinomerikano ku a yega di risibí na Merka platina pa dos álbum na spañó (Romance and Segundo Romance). Mas importante ainda, e ta konosí pa su aktuashonnan bibu loke nos por bai eksperensiá fin di ougùstùs. 

The Roots ta un di e promé asina yamá ‘live hip-hopacts’ ku músiko mes en bes di tokadisko i pa no papia mes den sírkulo di  r&b, soul i funk. Aktuashon bibu di The Roots ta un eksperensia di bèrdat, yen di deskubrimentu original i nan ta traha hopi bes ku talentonan nobo i sorpresivo, no solamente na North Sea Jazz, pero rònt mundu!

E old-school soul ku Raphael Saadiq gusta interpretá, ya pa un par di aña ta den ‘spotlight’. Saadiq a laga tende di dje den añanan ochenta den soultrio Tony! Toni! Tone!. Despues di e éksito ei el a traha tras di kortina ku tur loke tabata zona dushi: The Roots, D'Angelo, Joss Stone, Stevie Wonder, asina por sigui nombra mas. Pero despues di e éksito di The Way I See It di aña 2008, fortunadamente e ta laga su mes stèm resoná atrobe.

Los Lobos ta muchu mas ku e hit enorme di nan La Bamba, ku nan a kosecha mundialmente na final di añanan ochenta éksito tras di éksito. E aña akí e banda ta kumpli 40 aña i nan tin kantidat di álbum i hit riba nan nòmber. Den zomer di aña pasá e banda a bini ku un edishon nobo di e álbum Kiki na honor di e binti aniversario di e álbum legendario akí di Los Lobos.Christian McBride ta bini Kòrsou ku su Big Band. E basista i kompositor influyente akí ya ta tokando pa binti aña un ròl importante den Jazz. El a yega di toka ku e grandinan aki na mundu manera   Sonnie Rollins, Chick Corea, Herbie Hancock i Pat Metheny.
 
Un fiesta garantisá ta loke ta bai resultá ora e banda hulandes New Cool Collective subi esenario. New Cool Collective ta konsistí di saksofonista Benjamin Herman, guitarista Anton Goudsmit, drùmer Joost Kroon, perkushonista Frank van Dok i Jos de Haas, pianista Willem Friede, basista Leslie Lopez i trompetista David Rockefeller.  

Esperanza Spalding dos aña pasá a gana un Grammy pa e Mihó Nobato i nan a proklam’é komo Artista di Jazz di Aña durante presentashon di Boston Music Awards. Un rekonosimentu estupendo pa e merikano ku a gana ku  Chamber Music Society (2010) ademas di amantenan di Jazz tambe e grupo grandi di públiko. Radio Music Society, ku a sali riba merkado aña pasá, ta susesor di e álbum gloriá di Spalding i ku a konosé un variedat di artista invitá renombrá. Asina ta ku saksofonista Joe Lovano, rapper Q-Tip i e leyendanan di drùm  Billy Hart i Jack DeJohnette nan tur ei a duna un kontribushon na realisashon di e disko.  

Pa i durante e festival lo tin diferente presentashon riba nos isla di kua e promé ta konosí awor: El Gran Combo de Puerto Rico. E orkesta di Salsa últimamente a selebrá su di 50 aña di eksistensia i ta ser nombrá tambe komo e orkesta mas popular di salsa. Ku su presentashon esaki lo bira un fiesta enorme, djaluna 26 di ougùstùs riba Brionplein na Awasá.