E kartelero tantu sperá di e alineashon di músikonan pa: “Curaçao North Sea Jazz Festival 2024”, finalmente den su totalidat a keda kompletá

E ekpo di Organisashon di “Curaçao North Sea Jazz Festival 2024”, ta sintié sumamente orguyoso di por anunsiá e distinguido nòmbernan di e músikonan artista, ku lo bai partisipá den e próksimo edishon di e festival akí na Kòrsou. Riba djaweps 29 di ougùstùs benidero lo presentá e músiko yamá AFRO 23; di akuerdo ku e alineashon i djábièrnè 30, ta Joss Stone mes lo ta presente riba esenario. Aloe Blacc i tambe Kamasi Washington, ta e músikonan, ku lo kompletá e programa di djásabra 31 di ougùstùs. E festival lo keda inougurá riba djárason 28, inisiando asina e Festival pa medio di un konsierto gratuito di e músiko artista hulandes yamá: Candy Dulfer dunando su presentashon den “Kurá Hulanda Village”.

E kantante, pianista i produktor kubano yamá: AFRO 23 tabata tokadó di perkushon  den e banda musikal ku tabata hiba e nòmber di: “Orquesta Caisimú”. E tabata ademas di tur eseinan, direktor musikal di e banda ku tabatin e nòmber di: “Orquesta Salsa Candela”. E tabata toka tambe piano den e “Orquesta Sonido Caliente”; anto  e tabata duna su kolaborashon musikal ku hopi otro orketa grandi ku tabata interpretá músika kubano den nan repertorio. Despues di a biaha pa basta tempu rònt mundo i ku el a siña konosé un gran kantidat di ritmo i zonido tur sorto di kaminda, finalmente el a bin establesé na siudat di Miami. Ei, na Miami, el a firma su promé kontrato diskográfiko na aña 2022, pa despues  e emití i lansa su eksitoso disko sengel ku ta hiba di  título: “Soy Afro 23”.

Joss Stone ya tin bastante tempu den e ramo di negoshi di espektákulo musikal, pa ta mas eksakto durante un temporada di mas ku binti aña. Tempu ku el a debutá na aña 2003, ku e agrupashon musikal: “The Soul Sessions”, e tabatin apénas e edat di djesseis aña. Ya for di e debut ei, estando bastante hóben, el a sa di lansa i emití no ménos ku ocho álbum di studio adishonal mas. El a  gana un premio Grammy i tambe dos premio BRIT mas.  Joss  tabata  aktuando  realmente ku e  grandinan den e ramo musikal manera: James Brown, Herbie Hancock, Stevie Wonder i Mick Jagger. Na e momentonan akí e ta riba un gira musikal promoshonal pa su álbum grabá bibu, ku ta hiba di título 20 Years Of Soul.

Aloe Blacc ta mas bien konosí komo: kantante, rapero i músiko merikano. Despues ku e tabatin su gran éksito musikal ku tabata hiba di título: “I Need A Dollar”, el a fortifiká su mes aínda mas sólido riba mapa musikal na aña 2013, ora el a skirbi i a kanta pa saka e disko sengel yamá: ‘Wake Me Up’, huntu ku e DJ sueko ku a fayesé, ku tabatin e nòmber di Avicii. Blacc su di sinku i mas resiente álbum musikal yamá: ‘All Love Everything’, ku a keda emití i lansá eksitosamente riba merkado musikal na aña 2020. Sin embargo na luna di mei di e aktual aña akí, Aloe a anunsiá dos EP nobo pa subi merkado e aña akí mes, ku ta hibando di título: “Rock My Soul”, ku ta konteniendo un kantidat grandi di vershon di soul, ku kanshonnan di e género musikal di rock.

E multi-instrumentista, kompositor i ademas direktor di orkesta yamá: Kamasi Washington a sa di realmente sakudí mundo di músika kuminsando fo’i aña 2015 ku su álbum komo debutante, ku tabata tin un durashon di no ménos ku tres ora largu hibando e título di: ‘The Epic’.Kamasi ta kolaborando ku un gran kantidat di artista den diverso i distinto género musikal, ku ta inkluí entre otro músikonan di taya manera: Kendrick Lamar, Herbie Hancock, Chaka Khan i Snoop Dogg. Washington a proporshoná e músika i su musikalidat pa e dokumental ku a hiba di título: ‘Becoming’, di Michelle Obama, anto esei a sòru pa Kasami haña e balor i honor di risibí nominashonnan di premio Emmy i tambe di premio Grammy, miéntras ku na aña 2020, Washington tabata ko-fundador di e supergrupo ku ta hiba e nòmber di: ‘Dinner Party’  den kompanía di Terrace Martin, Robert Glasper i 9th Wonder. Su álbum mas resien yamá: ‘Fearless Movement’, a keda emití i lansá riba merkado musikal na prinsipio di e aña korriente akí.

E dama saksofonista hulandes, ku ta rospondé bou di e nòmber di Candy Dulfer a gana fama internashonal pa motibu di i danki na su kolaborashonnan artístiko ku músikonan manera entre otro: Prince, Van Morrison i Dave Stewart di Eurythmics. Ku loke a keda menshoná awor ei, Candy Dulfer a anotá definitivamente un éksito musikal di gran kaliber i di taya mundial ku e piesa musikal di título: ‘Lily Was Here’. Su álbum ku kua el a debutá, ku tabata hiba komo titulo “Saxuality” a resultá nominá inmediatamente pa optené i risibí tambe un premio Grammy miéntras ku vários di su produkshonnan diskero sengel a alkansá meresidamente e posishon number 1 riba tablero musikal di Estados Unidos merikano. Dulfer tin mas ku 30 aña ta rekoré rònt mundu, ku su propio banda. Na aña 2022 a mira lus di día su obra musikal i ku ta na benta komo su último álbum ku ta hiba di título: ‘We Never Stop’ (Nos no ta Stòp Nunka).