Djaweps
29 Ougùstùs

Havana D’Primera

E banda kubano di Timba yamá Havana D’Primera ta pone su públiko definitivamente  move durante su presentashon. E banda musikal akí a keda fundá na aña 2008 pa Alexander Abreu i a forma e ora ei tambe un kolektividat i konglomerashon di músiko di   e mundu musikal kubano pa un total di 17 miembro. Abreu ta ser konsiderá komo un di e mihó trompetistanan di su generashon i e ta además de esei un kompositor talentoso, kantante i direktor di orkesta. Hopi hende ta konsiderá ku éksito di mas grandi di e banda ta e piesa Me Dicen Cuba, como e himno nashonal nobo di Cuba. Nos a mira anteriormente Havana D’Primera na Curacao North Sea Jazz Festival: na aña 2016 kaminda nan a forma parti di e proyekto di Sergio George bou di e nòmber: The Cuban Affair. Ku su meskla di ritmonan kaminda ta integrá salsa, jazz i Afro-cubano e banda akí ya a saka kuater álbum di studio di grabashon. Su último obra, Cantor Del Pueblo di aña  2018, a duna nan e di dos nominashon di Latin Grammy pasobra e tabata E Mihó Album di Salsa.

Aymée Nuviola

Aymée Nuviola, ku tin e nòmber di kariño ‘La Sonera del Mundo’ ta un kantante respetá prosedente di Cuba ku a sigui su estudionan na Conservatorio Manuel Saumell na La Havana. Semper el a sintié atraé na ritmo di Bossa Nova i e ritmo tambe di Salsa, pero tambe na músika di Debussy. Nuviola ta un di e streanan di mas grandi di awendia na Cuba i hasta inkluso el a graba un piesa ku e  leyenda musikal merikano Jackson Browne.Tambe el a interpretá e papel di su ídolo Celia Cruz den e telenovela Celia. Mama di Nuviola a siñ’é toka piano tempu e tabatin edat di tres aña, i na edat di nuebe aña el kuminsá kanta profeshonalmente ku su ruman muhé Lourdes bou di e nòmber The Nuviola Sisters. Na edat di diessinku aña e dos rumannan muhé a forma parti di e orkesta famoso kubano di Pachito Alonso y Sus Kini Kini. Komo kantante hóben Nuviola a muda bai e siudat di Miami, kaminda su karera komo kantante solista realmente a kuminsá. Aña pasá Aymée a gana su promé Latin Grammy Award pa su álbum ku el a saka titulá: Como anillo al dedo edishon di aña 2017.