Juan Luis Guerra 440, Jennifer Hudson i Maluma presente den Curaçao North Sea Jazz 2024

Ku gran plaser i ku un orguyo inmenso, organisashon di Curaçao North Sea Jazz Festival ke anunsiá tres artista nobo, ku lo duna nan presentashon den e próksimo edishon. A añadí Juan Luis Guerra na e programashon di djabièrnè 30 di ougùstùs; miéntras ku Jennifer Hudson i tambe Maluma ta añadí na e programashon di djasabra 31 di ougùstus.

E gran músiko, kantante, kompositor i produktor Juan Luis Guerra ta un di e artistanan latinoamerikano, ku a kosechá un fama i popularidat musikal mundial sin igual, ku tin ademas mayor sifra di benta di su produkshonnan artístiko. Durante su karera el a bende vários mion di álbum, i tambe el a risibí un kantidat numeroso di premio pa djis menshoná algun di nan ku ta:  Latin Grammy’s, Grammy Awards i Latin Billboard Awards. Guerra, sin kita i sin pone, ta realmente un artista favorito di su públiko i esei ta e motibu prinsipal, ku e tabata e artista ku a keda invitá mas bes na e festival, kaminda el a sa tambe di hasi su presentashon kada bes atrobe un presentashon inolvidabel. Su delaster álbum musikal ku ta hiba di nòmber, Radio Güira, a mira lus di día aña pasá.

Jennifer Hudson di nashonalidad merikano, ta un kantante i tambe kompositor di letra di kansion, aktris, presentadó di programanan bibu na televishon i tambe un produktora. Na aña 2004 e tabata un di e finalistanan den e programa di televishon di gran oudiensia di televidente yamá: American Idol,  anto pa dos aña despues di esei, el a sa di bira realmente sumamente konosí i popular pa su interpretashon di e ròl di Effie ku el a hunga den e pelíkula musikal Dreamgirls. Te na e momentonan akí Hudson a saka tres álbum, tambe el a aktua den pelíkula i serienan na televishon, el a presentá na Broadway i e tabata konsehera den e programa The Voice tantu na Merka komo na Gran Bretaña, miéntras ku for di aña 2020 e ta presentando su propio show di televishon. El a bira e muhé di mas hóben i e di dos muhé di desendensia Afro-merikano ku a yega di optené tur e kuater premionan prestigioso di entretenimentu merikano ku ta: Emmy, Grammy, Oscar and Tony (EGOT). Na aña 2020 e revista Time a nombr’é komo ún di e shen personanan di mas influyente na mundu. <.p>

E kantante i outor di kansion prosedente di Colombia yamá ‘Maluma’ ta un di e artistanan latino ku tin mihó benta di nan kreashonnan musikal artístiko. Su álbum di debut ku tabata hiba di título: “Magia” a mira lus di día na aña 2012, tempu ku Maluma tabatin edat di djeshete aña, loke a sòru pa e risibí su promé nominashon pa un -Latin Grammy-den e kategoría di e Mihó Artista Nobato. Tres aña despues, a sigui su álbum pa hasié pa e bira konosí i popular titulá:“ Pretty Boy, Dirty Boy”, ku tabata un kombinashon musikal di e géneronan Balada Suave i Reggaeton.                                Maluma a sigui amplia su tereno di labor ku su aktuashon briante banda di e artista Jennifer Lopez den e pelíkula ku tabata tin e título di: “Marry Me” di aña 2022. Sin embargo músika ta keda tòg ketu bai Maluma su enfoke mas importante i aña pasá el a emití su álbum mas resien ku tin e título di Don Juan, ku a keda nominá pa risibí un Grammy.