Tur hende ku ta bini di e époka di muzik di ‘disco’ realmente ta haña kueru di galiña ora nan tende e nòmber Chic. Chic tabata e banda di ‘disco’ di añanan 70 pa prinsipio di 80, ku tabata sòru ku e diskotekanan tabata bira loko loko i pèrdè kabes. Ku hitnan grandi manera Good Times, Dance, Dance, Dance i Le Freak e banda akí a haña fama mundial ku te dia di awe ainda no a disparsé.
Na 1984 esnan ku a lanta e banda Nile Rodgers i Bernard Edwards a disidí di pone un punto final tras di Chic ora e bentanan a kai enormemente i bai hopi atras. Komo produktornan eksitoso nan a kolaborá na álbumnan di entre otro Madonna, David Bowie i Duran Duran. Ora e formashon akí na un fiesta di hasimentu di aña na 1992 a toka nan hitnan bieu e señornan di Chic a disidí di duna Chic un bida nobo atrobe.
Na aña 1996 Edwards a fayesé durante un serie di konsierto na Hapon, e ora ei un bes mas a yega un fin abrupto na Chic. Sinembargo Nile Rodgers no por a resistí tentashon di e ‘spotlightnan’ i a kontinuá ku Chic na 2003 den un formashon kompletamente nobo. Ku e konstelashon nobo akí Chic ta trese semper bai e hitnan bieu ku mes tantu ánimo manera tabata e kaso den e añanan di ‘disco’ ku a pasa!