Lenny Kravitz,
J Bavlin i
Burt Bacharach
presente den
CNSJ 2016

Ya nos a anunsiá un lista di nòmbernan tremendo pa e edishon di CNSJ 2016 i awe nos por añadí tres nòmber mas na e lista aki pa djasabra. J Balvin lo habri djasabra anochi riba stage Sam Cooke i Lenny Kravitz lo klousurá djasabra anochi na stage Sam Cook. Tambe nos por anunsiá Burt Bacharach i su orkesta ku lo aktua riba e dia ei riba stage Celia. I riba djarason 31 di ougùstùs nos por konfrimá aktuashon di Al Jarreau na Brakapoti Mei Mei.

E komposistor i kantante Merikano i multi instrumentalista, produktor i aktor Lenny Kravitz, tin un pia den rock i e otro den soul, pero tambe a krese den mundu di jazz. Ku su debut album na 1989 Let love Rule e la sa di penetrá den mundu farandulero. Despues di ei a sigui diferente hit manera “Always on the Run”, “it Ain’t Over ‘til it’s Over” i “Are You Gonna Go My Way”. Tambe Kravitz a gana pa 4 aña sigui un Grammy Award komo mihó kantante di Rock maskulino. Ku esei e la kibra un rèkòrt komo kantante maskulino ku mas premio den e kategoria ei. Tambe e tin e rèkòrt komo mas premio ganá sigui den un kategoriai. Na 2014 su último disko a sali “Strut”, sigui den 2015 pa su video di konsierto Just let Go.

J Balvin, su nòmber original ta José Alvaro Osorio Balvin, ta un kantante di reggaeton di Medellin, Colombia. Komo mucha e ta tin masha interes pa diferente sorto di músika hiphop, dancehall, champeta i bachata i a kuminsá su karera ku su 17 aña i a biaha pa Merka pa bai studia ingles. Durante e 10 añanan ku a sigui e la traha na ambos pais i a haña fama den e kategoria urbano i bou di dj-nan. Aña pasá e la keda nominá na 13 okashon pa Billboard Latin Music Award. Su eksitonan ta Yo te lo Dije, Tranquila, Ay Vamos, 6 AM i Ginza

Kasi tur hende na mundu, konsiente òf inkonsientemente konosé un piesa skirbi pa Burt Bacharach. E maestro kompositor, ku e aña aki ta yega e edat di 88 aña, a komponé gran mayoria di su eksitonan huntu ku Hal David. Piesanan manera: Walk On By, What The World Needs Now Is Love i I Say A Little Prayer ta djis algun numero saka for di e repertorio amplio di e leyenda bibu aki.

Komo yu di un predikador Al Jarreau (1940) a pone su promé pasonan den kor di misa. E la start su karera komo profesional ku un banda ku George Duke. Na 1975 e la saka e disko We Got By i logra eksito grandi serka e publiko na 1981 ku su dusko Breakin’ Away, inkluso su mega hit Roof Garden. Na 7 okashon e la risibí un Grammy Award i ta e uniko artista ku a gana un Grammy den tres kategoria: Jazz, R&B en Pop.