Curaçao
International
BlueSeas
Festival 2015

“The blues, finding its way back home!”

Dia 27 di ougùstùs 1990, despues di un presentashon históriko ku su Double Trouble, na un manera trágiko Stevie Ray Vaughan a yega na fin di su bida. Henter mundu amante di músika tabata na luto. No solamente un genio riba kitara, pero e puru músiko a bai laga nos, tambe e hòmber ku su tokamentu, inigualabel energía i amor pa “blues” ku a sòru pa tantu speransa i alegría a keda ranká for di nos abruptamente. Mundu di blues i e género mes, manera a resultá después no a logra surpasá e golpi akí. Pa ta eksakto hustamente dor di Stevie su aktuashon mes e género a lanta kabes i tabata gosa di un popularidat nunka ántes mustrá bou di tur kapa di e públiko grandi, loke tabata un fenómeno no konosí meimei di añanan ochenta. 

Awor, kasi 25 aña despues, bo ta tende hopi bes: “Blues ta moribundo”. Un remarke hopi bes hasí dor di reportero, diskeronan i e asina yamá “konosedónan” di e género. Ta bèrdat ku  e “fluho mayor” radio no ta toka blues mas i ku éksitonan internashonal di e intérpretenan real di blues for di morto di Stevie Ray Vaughan a bira skars. Naturalmente Eric Clapton ku su amor pa e género pa medio di solo i ko-produkshon ku leyendanan bibu ainda ta mantené honor na e ‘momentum’. Tambe Buddy Guy, B.B. King, Charlie Musselwhite, Bonnie Raitt, Robert Cray i otronan for di e asina yamá “the old school” ta hasi nan bèst. Asina tambe e ‘nobonan’ manera Joe Bonamassa i Gary Clark, Jr.  

I te ei e ta keda. Por lo ménos asina nos a kere. Bèrdat ta eksigí nos sigui buska, di koba i ata: tin speransa na horizonte, ya ku blues ta floresé atrobe na Merka. No asina tantu e atenshon di medionan di komunikashon of benta di disko, pero mas bien den e sirkuito bibu di klupnan i na festivalnan, kaminda tin pedido pa presentashonnan ainda di héroenan di kitara, pero sigur tambe e atenshon pa e kantidat grandi di esnan nobo ku ta kresiendo den sentido apsoluto. Tambe na Inglatera i den algún país di kontinente di Europa ta presentando un interés salú pa e género di ‘blues’.   
Esaki no ta straña nos nada. Tendensianan den muzik popular di awendia, manera nos konosé nan for di final di añanan sinkuenta, ta bini i ta bai. Sin embargo pa algun sorto di muzik ku ta forma orígen i a para na base di e mesun muzik popular, pa nan ta konta otro regla. Nan ta puru, nan por wanta preshon di konseshonnan artístiko indeseá i ku esei durashon di tempu. Blues ta i lo keda semper un di e ekspreshonnan di muzik, manera ta e kaso ku jazz, góspel i salsa i e sortonan di muzik tropikal di e base Karibeño i di Amérika Latino. 
Kòrsou lo bai duna na e rebibamentu nobo di blues su propio kontribushon  Manera el a hasi esei tambe último dies aña pa medio di festivalnan pa muzik di salsa, jazz (Curacao North Sea Jazz Festival), i otro sorto di muzik merikano i europeo oksidental konosí i ménos konosí.

Aya kaminda New Orleans tin un posishon den mundu komo sentro mas prinsipal di blues i jazz, Kòrsou tin e ambishon di tuma e posishon pa á҈rea di Karibe i Amérika Latina. Ya ku Kòrsou a hunga un papel partikular den nasementu di entre otro blues. Kòrsou a fungi den di 17 siglo komo konekshon den e negoshi i transporte di katibu for di Wèst Afrika pa bai Nort di Merka entre otro. E katibunan a trese nan propio kuenta i muzik. E kompartimentu huntu di e ekspreshonnan akí tabata e úniko manera pa komuniká entre nan i pa ta solidario den nan sufrimentu!  
Lo duna inisio na un manera grandioso ku Curaçao International BlueSeas Festival den kapital di Willemstad!

Riba djaweps 7 i djabièrnè 8 di mei nuebe artista di blues lo duna presentashon grátis den kayanan di Punda, miéntras ku djasabra 9 di mei lo sera e festival ku dos konsierto na Kleine Werf na waf den haf di bahia Santa Ana.

Pa 7 i 8 di mei ya tin konfirmá Quinn Sullivan, Kat Riggins, Ana Popović, Joe Louis Walker, The Reverend Peyton's Big Damn Band, Lurrie Bell, Shemekia Copeland, Moreland & Arbuckle i The Slide Brothers. Pa 9 di mei e original Blues Brothers i leyenda di blues Buddy Guy lo klousurá e festival.

Otro informashon relevante tokante e festival akí lo keda anunsiá meimei di febrüari.