Oscar
D’Leon i
Juanes pa
Curacao
North Sea
Jazz

Djaweps 3 di sèptèmber e di seis edishon di Curacao North Sea Jazz Festival ta habri ku un grandioso evento grátis riba e tereno di festival di World Trade Center na Piscadera Bay. Nada ménos ku Oscar D’Leon i Juanes lo duna nan presentashon riba e isla. Mas informashon tokante repartishon di karchi di entrada lo keda anunsiá despues.

Kantante di Salsa Oscar D’Leon ku un karera musikal di mas ku kuarenta aña ta un di e músikonan latino mas destaká na mundu. E tabata kombiná na prinsipio su karera di kantante ku un trabou komo shofùr di taksi i di bùs na Caracas, pero pronto el a troka su pasaheronan pa salanan grandi. D’leon a siña su mes toka bas, el a lanta na 1973 su promé banda La Dimensión Latina i pronto despues ya e tabatin su promé hit. Den añanan ochenta e tabata pa largu tempu na Cuba, e pais na kua segun e mes, e ta gradesido pa tur su influensianan musikal. Nan ta yam’é e mas kubano di tur kantante no-kubano. E benezolano karismátiko lo no sosegá promé ku tur hende na Kòrsou ta pasando bon. Pa hasi esei e ta trese no ménos ku diesseis músiko: un sekshon di ‘brass’ fuerte, algun vokalista, korista i naturalmente e perkushon inseparabel di salsero na nivel tòps.

Juanes ta e artista di rock pop latin mas importante di último añanan. Nasé komo: Juan Esteban Aristizábal Vásquez e kantante guitarista ta krese na Medellin, Colombia. E ta start su karera na edat di 15 aña den e banda Ekhymosis ku kua e ta saka sinku álbum. Despues ku e banda a kai for di otro e ta saka su promé álbum komo solista ku e título, ‘Fíjate Bien’, pa kua e tin mag di risibí tres Latin Grammy Award. Su siguiente álbum ‘Un Día Normal’, riba kua tin e hit ‘A Dios le Pido’ ta trese ainda mas éksito p’e. E álbum ta alkansá den mas pais di latina Amérika e státus di platina. Su di tres álbum ‘Mi Sangre’ ta sòru pa Juanes haña gran éksito tambe den resto di mundu. E sengel ‘La Camisa Negra’ ta alkansá den diferente pais posishon number 1. Entre tantu e kantante kolombiano a bende mundialmente mas ku 15 mion di álbum i e tin entre otro 20 Latin Grammy Award, dos Grammy Award gewon i 9 MTV Award riba su nòmber. Tambe el a gana e BMI President's Award durante e BMI Latin Awards na aña 2010.