Rod Stewart
ta bini Kòrsou
pa Curaçao
North Sea
Jazz

Ku orguyo Curaçao North Sea Jazz ta anunsiá binida di Rod Stewart na e festival. E kantante legendario ta presentá djabièrnè 29 di ougùstùs riba tarima Sam Cooke, meskos ta e kaso ku e kantante Joss Stone, Seun Kuti & Egypt 80. Janelle Monáe, Boz Scaggs i Henry Butler, Steven Bernstein and the Hot 9. i Boz Scaggs lo duna nan presentashon djasabra 30 di ougùstùs.

E ta para garantia pa konsiertonan festivo yen di energia: Rod Stewart ta alegrá e fanátikonan ku rock ikóniko i favoritonan di R&B manera Maggie May, I Don’t Want To Talk About It, Hot Legs, You’re In My Heart, Da Ya Think I’m Sexy, Sailing, Some Guys Have All the Luck, Young Turks and Forever Young. Ku su stèm úniko i teksto di músika ku ta konta kuenta i su presentashonnan pashoná bibu, Rod Stewart a edifiká un di e kareranan musikal mas duradero di tur tempu. Durante su karera ku ta enserá sinku dékada el a bende riba mundu henter mas ku 150 mion álbum. El a skor kantidat di tòphit i el a keda kondekorá masha hopi bes, entre otro ku 18 nominashon pa Grammy i no mas ku dos introdukshon den Salon di Fama di Rock and Roll. Na aña 2007 el a keda nominá pa reina di Inglatera komo “Komandante di Imperio Britániko (CBE). Na kabamentu di aña 2012 Stewart a bira un autor ‘bestseller’ ku edishon di su outobiografia tan sperá. Na mei 2013 el ta presentá su promé álbum di Rock den 10 aña ku diesun komposishon propio. ‘Time’ a yega den e álbumnan ingles komo number 1 i ku esei el a skor un rekòrt britániko nobo pa e provishon entre dos álbum number 1 dor di un artista. Na Merka esaki ta e álbum ku ta skor mihó ku su mes komposishonnan for di 1979.

E kantante di soul britániko Joss Stone a sorprendé mundu musikal na 2003 ku un álbum di debut komentá yen di ‘cover’. Ku The Soul Sessions a keda produsí tempu e tabatin diessinku aña tabata parse inkreibel: e sonido di bos no tabata laga bo pensa na stèm di un puber, pero mas bien na stèm di un kantante femenino pintá dor di bida ku a pasa añanan largu den naitklupnan yen di huma. No ta straño ku The Soul Sessions a bira un klásiko moderno i for di e dia ei a bende miones di e álbum ei. Dies aña después di su flamante álbum di seshon, Joss a disidí aña pasá pa hasi e sírkulo kompletamente rondó i bai bèk kaminda tur kos a kuminsá, ku un kontinuashon riba su álbum di debut ku tabata bende miones. The Soul Sessions Volume 2 ta un presentashon fenomenal di balanse vokal, pashon i poder i e ta trese un kantidat di kansion bunita ehekutá pa un artista riba tòp di su forsanan vokal.

Siendo yu hòmber di e mundialmente konosí Fela Kuti ta manera ku Seun Kuti ta risibí e ‘afrobeat’ ku e papa ku e tabata kome for di chikitu. Huntu ku Egypt 80, e banda famá di su tata, Kuti ta trese un meskla hipnotisante di: jazz, funk i ritmonan afrikano. E kooperashon entre e dosnan ei ta bai bèk ya pa hopi aña: na edat di nuebe aña Seun tabata toka ku e banda komo programa preliminar na e konsiertonan di Kuti senior.

Finalmente a haña un susesor di trono pa Prince i e yama Janelle Monáe. Monáe ta traha piesanan sumamente bailabel i funky pa kua e ta keda inspirá dor di diferente influensia di: jazz i soul te hiphop i mundu musikal. Na 2010 a aparesé su álbum di debut ArchAndroid serka Bad Boy Entertainment, e seyo di Sean Combs. E álbum a risibí krítika positivo i un nominashon Grammy komo mihó álbum R&B di 2011. E disko a yega te na e di diesshete lugá riba e lista di hit di Billboard. Esei a dun’é seis nominashon di Grammy na 2012. Na final di aña pasá a aparesé e susesor di e álbum akí The Electric Lady.

For di e momento ku e leyenda di New Orleans Henry Butler a establesé su mes na Brooklyn, tabata parse solamente kestion di tempu promé ku e kantante talentoso akí i pianista for di Delta di Mississippi lo a buska kooperashon ku trompetista i lider di banda Steven Bernstein di New York. Huntu nan a saka e disko Viper’s Drag ku ta brota di plasernan di e jazz di New Orleans.

William Royce ‘Boz’ Scaggs a traha nòmber komo kitarista den Steve Miller Band. Komo artista solista e ta skor diferente hit Top 20 manera: Lowdown, Lido Shuffle i What Can I Say prosedente di e álbum ku a keda bon risibí ku e título Silk Degrees, ku ta yega te na  number 2 riba Billboard Hot 100. Ultimo añanan e ta saka ku sierto regularidat disko. Su último álbum Memphis ta data for di 2013. Den e aña ei e tabata den gira ku Donald Fagen i Michael McDonald bou di nòmber di: ‘Dukes of September Rhythm Revue’.