Bruno Mars
i Juan Luis Guerra
presente na e
di sinku edishon

Dia 29 i 30 di ougùstùs Curaçao North Sea Jazz Festival ta selebrá su promé lustro. Anto esei lo para bira un fiesta grandioso. E promé nòmbernan ku por anunsiá pa e edishon di hubileo ta papia pa nan mes: Bruno Mars i Juan Luis Guerra lo duna nan presentashon riba tereno di festival na World Trade Center na Piscadera Bay.

Bruno Mars ta un kantante ku ta gosa di hopi apresio i e tin un fama sin igual. E ta tambe kompositor, produktor i músiko. E ta nominá 18 biaha pa Gammy Award i a resultá ganadó tambe, e tin mundialmente mas ku 115 mion disko sengel bendí. Su álbum aktual Onorthodox Jukebox i su álbum di debut Doo-Wops & Hooligans en total a yega mundialmente na e kantidat di 60 x un disko di platina. Segun Billboard, Mars a skor su promé hitnan number 1 di e “Hot 100”, mas lihé ku tur otro artista maskulino for di époka di Elvis Presley. Komo kantante, kompositor i produktor, Mars tin un katálogo impreshonante ku 22 hit “Hot 100”. Bruno Mars ku su banda di 8 músiko The Hooligans aktualmente ta riba un gira mundial ku tur karchi ya kaba kompletamente bendí i djadumingu 2 di febrüari 2014 lo e presenta durante e Pepsi Superbowl XLVIII Halftime Show.

Pa Juan Luis Guerra esaki lo bira e di dos bishita na e festival. Na 2011 e rei dominikano di merengue tambe tabata wespet, kaminda el a duna un presentashon di kita sombré ku te ainda ta hopi bon komentá. E ta varia merengue i salsa ku bachata, mesklá ku Afro-pop, jazz i kantika folklóriko. Pa kasi 30 aña Juan Luis Guerra ta un di e artistanan latino mas respetá na mundu. Ku mas di 30 mion disko bendí, 15 Latin Grammy Awards, 2 Latin Billboard Awards i 2 Grammy's ketu bai e ta komandá e listanan di rekòrt. Pa e motibu ei organisashon ta kontentu ku nan por yam’é bon biní un bes mas na aña 2014.

Djasabra 30 di ougùstùs Juan Luis Geurra ta habri e anochi riba tarima di Sam Cooke. Riba e mesun tarima ei, Bruno Mars ta klousurá e anochi.

Antisipando previamente e festival, djaweps 28 di ougùstùs lo tin un konsierto grátis riba e tarima Sam Cooke na e tereno di festival. Metropole Orkest lo brinda un oda na e músiko yu di Kòrsou Doble R (Rignald Recordino). Ku entre otro Karin Bloemen, Izaline Calister, Giovanca, Ompie Stefania i Randal Corsen.