Carlos Santana, e leyenda di kitara ku no tin mester di ningun introdukshon, ta bini ku su banda pa e di tres edishon di Curaçao North Sea Jazz! E ta un di e dos titularnan di e festival. E super strea mehikano a haña su fama den añanan 60 i 70 ora ku su banda Santana tabata pionero ku e ritmonan:  rock, salsa i jazz fusion. Ruben Blades a laga sa ku e ta bini e aña akí atrobe. Aña pasá e kantante/kompositor panameño akí tabata ya kaba riba esensario Sir Duke, pero lamentablemente dor di e interes enorme no ta tur bishitante di e konsierto por a mir’é.

Komo di tres nòmber nos por anunsiá e tan famoso Dizzy Gillespie™ All-Star Big Band. E orkesta lo presentá djabièrnè i ta konsistí di hopi Gillespie alumni, manera Paquito D’Rivera ku lo kondusí e big band na e presentashon Curaçao North Sea Jazz Festival. Paquito, nasé na Havana, Cuba, ta ser konsiderá komo e músiko di Jazz kubano mas kreativo i un di e mihó tokadónan di klarinèt na mundu. Pa loke ta trata djasabra nos por anunsiá ku James Farm lo toka. Den e banda nobo nobo e saksofonista Joshua Redman ta kombiná ku un gran talento di generashon nobo di Jazz e pianista Aaron Parks. Nan ta keda kompañá pa un sekshon di ritmo fantástiko: bahista Matt Penman i drùmer Eric Harland.

E aña akí no tin ún, sino dos konsierto grátis, den preparashon pa e festival mes. Djadumingu 26 di ougùstùs i djaluna 27 di ougùstùs Kòrsou kompletu lo por gosa di e konsiertonan grátis na Brionplein. Pronto lo anunsiá kua ta e artistanan ku lo presentá.
 
Curaçao North Sea Jazz den su dos edishonnan a mustra i demostrá di ta un evento di klase mundial. Artistanan internashonal tòps a bini Karibe pa partisipá na e festival. Prensa di diferente pais a publiká tokante un evento yen di ambiente i ta gaba hospitalidat di Kòrsou.  Fundashon Bin Intenshon ta hasi Curaçao North Sea Jazz posibel. Kua lo ta e artistanan ku nos lo por spera, lo bini na kla den e próksimo lunanan. Aktualmente e progamadónan di e festival huntu ku Gregory Elias ta den kombersashon i deliberashon pa hinka un programa mas variá i atraktivo posibel den otro.

CURAÇAO NORTH SEA JAZZ FESTIVAL
djabièrnè 31 augustus ku e.o. Santana, Ruben Blades i Dizzy Gillespie™ All-Star Big Band anto djasabra 1° sèptèmber 2012 ku e.o. Joshua Redman's James Farm, na
World Trade Center, Piscadera Bay.

Benta di karchi pa Curacao North Sea Jazz ta kuminsá djaluna 2 di aprel benidero
Karchinan ta optenibel na e puntonan di benta: Mensing Caminada, Mobile Planet, Tik-Tak(solamente credit card i maestro), 24 Uur Uit de Muur (credit card, maestro i kèsh). E posibilidat ta eksistí pa for di 1° di febrüari pa kuminsá reservá karchi via 522-JAZZ. Pago na kuota ta posibel ku nafl 15.00 na gastu di atministrashon èkstra.
 
Karchi ta $ 195.00 òf Nafl 354.90, pa dia inkluso ob.

Benta internashonal di karchi di festival ta kuminsá for di 1° di febrüari próksimo
For di 1° di febrüari ya kaba bishitantenan internashonal lo por kuminsá hasi reservashon online pa karchinan lòs di festival i nan akomodashonnan i tambe hasi nan pago. Nan lo por skohe for di e oferta di hotelnan mas grandi i apartamentu na Kòrsou. Tambe a regla servisio èkstra pa risibí karchi di festival direktamente na yegada na aeropuerto òf hotel i transporte pa e hotèlnan di hospedaje.
   
Pa bishitantenan for di Hulanda i Sürnam tin areglo di biahe ku ta inkluí: buelo, estadia, transferensia i karchi di entrada pa festival. Pa mas informashon subi nos nos partner di biahe eksklusivo Does Travel & Cadushi Tours, www.caribbean.nl, mail tour@doescadushi.com. 

Fundashon Bon Intenshon ta hasi Curaçao North Sea Jazz Festival posibel.

Djabièrnè 31 di ougùstùs i djasabra 1° di sèptèmber 2012 lo selebrá e di tres edishon di Curaçao North Sea Jazz den World Trade Center. Despues di dos edishon eksitoso tur hende tin hopi gana atrobe pa organisá un bunita festival.  

E siman promé ku e festival kuminsá Curaçao North Sea Jazz ta organisá dos konsierto grátis na Plasa Brion riba 26 i 27 di ougùstùs. Entre 27 i 31 di ougùstùs lo tuma lugá diferente konsierto riba e isla. Mas informashon tokante esaki lo sigui despues. Tambe lo anunsiá ku bastante antisipashon ki dia benta di karchi lo kuminsá.

Karchinan pa konsierto di djasabra 3 di sèptèmber a kaba kompletamente!

Pa konsierto di djabièrnè 2 di sèptèmber a sobra ainda algun, pero buska nan tempran promé ku nan tambe kaba!!

Miéntras ku aktualmente ta montando den ‘full swing’ e festival, awenochi e siman di festival ta kuminsá ku un konsierto grátis di Los Van Van na Plasa Brión. E konsierto ta kuminsá 21.00or. Mañan djamars Trijntje Oosterhuis ta presentá 21:00 or den hotèl Avila. Entrada pa e konsierto akí ta na rason di Nafl. 50,= na Albert Heijn, Bruna i na hotèl Avila mes. E anochi mes di presentashon e karchi di entrada ta kosta Nafl. 60,=. Selah Sue ta toka djárason na Mambo Beach. E konsierto ei ta kuminsá 22:00 or, entrada ta na benta pa 45 Nafl. E último programa preliminar ta djaweps 1° di sèptèmber. E ora ei Eliane Elias ta presentá for di 20:30 or den Brakapoti Meimei. Entrada na rason di $35.00 ta na benta na Brakapoti Meimei i na 24 uur uit de Muur. Tur e sumanan menshoná ta sin kosto di servisio i sin ob.

E organisadónan a reservá sufisiente lugá di parker pa e bishitantenan di e festival. E lugánan di parker akí tin iluminashon i ta bou di vigilansia permanente. For di e lugánan di parker regularmente tin konvoinan ta kore grátis pa hiba e bishitantenan WTC.

Dia 2 i 3 di sèptèmber e portanan di festival ta habri for di 18:00 or (6 or di atardi). For di 17:00 or (sink’or) e lugánan spesial pa parker ta habrí pa públiko:
-         Paden i pafó di stadion Johnny Vrutaal;
-         Coney Island;
-         Vèlt di Mundu Nobo;
-         Vèlt di Jong Holland (Zakito);
-         Vèlt di Para Sasa.

E lugánan di parker akí ta indiká ku e bòrchinan ‘Parking’. Mustrando bo tarheta di entrada e lugánan di parker i e servisio di ‘shuttle’ ta grátis.

E konvoinan ‘Shuttle’ ta hiba Bo te serka di e entrada i tga hibabu  bèk na e lugánan di parker. Bo ta subi e konvoi na e mesun lugá kaminda e anochi ei bo a baha for di e konvoi.

Por sosodé na un dado momento ku un di e lugánan di parker indiká ta yen, òf ku e ruta pa bai na e lugá ta blòkiá. Pa e motibu ei nos ta pidi públiko enkaresidamente pa sigui e instrukshonnan di polis ku lo sòru pa bo por parker bo outo na un manera bon, sigur i seif.